CEBU CITY- Gipangunahan sa Bureau of Customs (BOC) ug National Bureau of Investigation (NBI) ang pag-inspeksyon sa 25 ka container van nga adunay gibanabanang ₱980 milyon nga kantidad sa gidudahang ilegal nga sigarilyo nga nasakmit sa mga awtoridad sa Mandaue City, Cebu, karong Sabado, Hulyo 11, 2026.
Personal nga nagsusi sa mga nakumpiskang kargamento si BOC Commissioner Ariel F. Nepomuceno uban si NBI Director Melvin A. Matibag sa Gothong Yard, kauban ang bag-ong milingkod nga District Collector sa Port of Cebu nga si Atty. Zsae Carrie C. De Guzman.
Ang maong operasyon giila sa mga awtoridad isip usa sa labing dagkong anti-smuggling operations sa Central Visayas. Gisundan ang inspeksyon og press conference sa Cebu International Port (CIP), diin gipadayag sa BOC ug NBI ang mga detalye kabahin sa operasyon ug sa nagpadayon nga imbestigasyon.
Matod ni Commissioner Nepomuceno, gisugdan ang operasyon niadtong Hulyo 2 sa usa ka pribadong pantalan sa Mandaue City human ma-isyu ang Letter of Authority ug Mission Order subay sa Section 224 sa Customs Modernization and Tariff Act (CMTA).
Gihimo ang inspeksyon base sa intelligence report nga nadawat sa BOC sa pakigtambayayong sa NBI ug Philippine National Police–Criminal Investigation and Detection Group (PNP-CIDG), nga misangpot sa pagkadiskubre sa gidudahang mga ilegal nga sigarilyo sulod sa 25 ka container van.
Gipahayag sa BOC nga ang maong operasyon kabahin sa gipakusog nga kampanya sa gobyerno batok sa smuggling aron mapanalipdan ang kita sa estado ug mapugngan ang ilegal nga pamatigayon sa mga produktong tabako.
Samtang, nagpadayon ang hiniusang imbestigasyon sa BOC ug NBI aron mailhan ang mga responsable sa maong shipment, masuta ang gigikanan sa kargamento, ug matino ang posibleng mga paglapas sa CMTA ug uban pang may kalabotan nga mga balaod.
