CEBU CITY-Nasakmit ang kapin 3 ka kilo sa gituohang shabu gikan sa usa ka food attendant atol sa gipahigayon nga operasyon sa mga sakop sa kapulisan sa F. Cabahug St., Barangay Kasambagan ning dakbayan sa Sugbo pasado alas 6 sa gabii niadtong Disyembre 23, 2024.
Giila ang dinakpan nga si Nyzanne Pepito, alyas “Nesan”, 38 anyos, ug lumulupyo sa Sudlon, Lahug, Dakbayan sa Sugbo nga giisip nga usa ka High Value Individual sa anti-drug operation sa mga kapulisan.
Nadakpan si Pepito pinaagi sa usa ka buy bust operation sa mga sakop sa City Intelligence Unit ug sa City Drug Enforcement Unit sa Cebu City Police Office nga gipangulohan ni PLt Col Antonietto Cañete.
Nasakmit sa posesyon sa suspek ang dul-an sa 3 ka kilos sa gidudahang shabu nga gibana-bana mobalor ug P20,468,000.
Kasamtangang ana sa kustodiya sa CCPO ang dinakpan samtang giandam ang mga tukmang kaso ipasaka batok kaniya.
Pahimangno sab ni PCol. Cañete sa mga illegalista nga hunungon na ang ilang aktibidad tungod way puas ang kapulisan sa dakbayan nga ibalhog sila sa prisohan.
