CEBU CITY-Mokabat sa 80 ka mga panimalay ang naugdaw human nga miulbo ang sunog gahapong adlawa, Enero 24 sa Purok Kamungay, Sitio Libra, Barangay Poblacion sa dakbayan sa Talisay sa habagatang Sugbo.//
Gikatahong mokabat sa 3-Milyones ang kinatibuk-ang danyos sa naasoy nga sunog.
Giingon nga pasado alas 9 sa buntag sa dihang niulbo ang kalayo ug giisa kini sa third alarm sa kabomberohan sa Talisay Fire Staton, ingon man nga dali ra kining nakontrol.
Kasamtangang anaa na ang mga biktima sa Talisay City Sports Complex diin nagka-anam-anam na og abot ang mga hinabang alang sa ilaha.
Sa pakighinabi sa Bombo Radyo Cebu News Team kang Lowella Vestil, ang OIC Assistant Department Head sa CSWD nga padayon pa ang ilang pag profiling sa mga biktima gumikan anaa pa’y uban nga padayon usab sa ilang pagpanghipos sa ilang mga butang paingon sa evacuation center.
Dugang pa niini nga nag-anam-anam na sila og apud-apod sa mga hinabang sama sa pagkaon sulod sa 3 hangtud 5 ka adlaw diin gisugdan dayon gahapong adlawa sa hapon.
Samtang, gipaambit ni Araceli Angcon, usa sa mga biktima sa sunog nga mapasalamaton kini sa nadawat nga mga tabang apan, ang iyang gikabalak-an nga dili kaigo ang iyang pamilya sulod sa tent atol sa oras sa pagkatulog.
Gisaysay usab niini ang ilang kaagi atol sa pag-ulbo sa sunog diin ang iyang anak na ang mihatag sa iyaha og mando nga mogawas sa ilang panimalay gumikan sa baga nga aso ug sunog nga milapas na sa atop.
Dugang pa niini nga tungod sa kusog nga hangin, usa usab kini sa mga hinungdan nga dali nga mikatap ang sunog ug ang luyo nga bahin nga mga panimalay mugna na sa mga light materials nga daling gikaon sa kalayo.
