CEBU CITY — Dako gihapon ang pagsalig ni Presidente Rodrigo Duterte ngadto ni kanhi Bureau of Corrections (BuCor) director general Nicanor Faeldon bisan pa man sa gi-atubang niini nga kontrobersiya.
Kini bisan pa man og gitaktak sa presidente si Faeldon gumikan sa kwestyonableng pagpagawas sa konbiktado nga granted sa good conduct time allowance law (GCTA), lakip ang tulo sa mga suspect sa pagpatay sa managsuong Chiong.
Atol sa groundbreaking ceremony sa housing project sa Naga City, Cebu, nagkanayon si Duterte nga dako ang iyang pagtuo ni Faeldon gumikan kay tarong kini nga pagkatawo.
Gidayeg ni Duterte si Faeldon human nga mihatag kini og impormasyon mahitungod sa pag-produce sa usa ka cigarrette company og peke nga cigarrette stamps.
Samtang mitambong sa maong event ang inahan sa Chiong Sisters nga si Mrs. Thelma Chiong apan wala kini makahigayon og duol sa presidente sa personal aron magpasalamat.
Kahinumduman nga gimanduan ni Duterte ang dul-an 2,000 ka mga piniriso nga nakagawas ubos sa GCTA law nga mosurender dayon sa kapulisan sulod sa 15 ka adlaw.
Matud ni Chiong nga mipasalig si Police Regional Office-7 Director Brigadier General Debold Sinas kaniya nga masikop ang tulo sa mga konbiktado sa Chiong sisters sulod sa ultimatum ni Duterte.
