CEBU CITY– Gihatud na sa katapusang pahulayan ang 9 ka mga biktima sa disgrasya nga nahitabo sa lungsod sa Boljoon niadtong nakalabay nga Biyernes sa kaadlawon, petsa 19.
Naghuot ang sulod sa Boljoon Cultural Sports Complex human nga midumog ang mga tao nga boot muhatod ug mupaabot sa ilang pahasubo sa mga pamilya nga nagbangutan tungod sa makapanimbawot balhibo nga hitabo diin sa kadali lang nakalas ang mga kinabuhi sa mga inosenteng bata.
Sa dayon na nga gipahimutang sa tagsa-tagsa nila ka mga lubganan ang mga patay nga lawas, ngidlis ug daw makabungog ang hilak sa mga pamilya nga naghatod sa ilang mga mahal sa kinabuhi sa menteryo uban sa kamatooran nga dili na gyud kini nila makit-an pa hangtud sa hangtud.
Gani duna pay usa ka ginikana nga nakuyapan ilabina usab sa kainit ug sa kadaghang tao.
Nasuta usab nga gidali nalang sa paglubong ang mga nangamatay tungod kay sakitan og samot ang mga kabanay nga magtan-aw sa ilang anak nga naa na sulod sa lungon.
Kahinumduman nga nalimbuwad ang mini dump truck nga gisakyan sa mga estudyante ug mga ginikanan para mupadulong unta sa usa ka district meet.
Gibangga sa driver ang truck sa usa ka bundo tungod kay nawad-an matud pa kini og kontol, apan tungod sa kakusog sa impact , naligid ang dump truck, nanglangbot ang mga sakay ug ang uban nadat-ogan pa.
8 ka tinun-an ug usa ka ginikanan ang patay samtang dili muminos 10 ang angol.
