CEBU CITY- Gipusil-patay ang usa ka ex-convict nga bag-o lang nakagawas sa prisohan human ma-priso gumikan sa ‘ilegal drugs’.
Sa pakighinabi sa Bombo Newsteam kang PMSG. Leigh Vincent Gonzalez, imbestigador sa San Nicolas Police Station, giila niini ang biktima nga si Francis Jake Padayao, 27-anyos, lumulupyo sa Calamba Cemetery, Calamba, Cebu City.
Gisaysay niini, nga ‘dead on the spot’ ang biktima human gipusil sa makausa nga higayon sa may dalunggan nga dapit sa wala pa mailhing gunman.
Dugang pa, nga nahitabo kini pasado alas 9 sa gabie Miyerkules, Oktubre 2, 2024 sulod sa sementeryo sa Calamba sa Barangay Calamba, dakbayan sa Sugbo.
Basi sa ilahang insiyal nga imbestigasyon, nasuta nga kasagarang mag-istambay ang biktima sa sementeryo kay daghan kini og mga higala sa naasoy nga dapit.
Matud pa ni Gonzalez, nga padayon pa ang ilahang imbistigasyon aron sa pagsuta sa hinungdan sa pagpatay sa biktima.
Apan, usa sa ilahang gipanglantawan nga anggulo mao ang ‘personal grudge’, ilabi na nga daghan kini ug nakabikil sa mao nga dapit kay kalit lang kini nga masuko.
