Malampusong natapos ang nahitabong Exercise Bantay Kadagatan 2025 nga usa ka multi-agency maritime exercise nga gipahigayon dinhi sa Sugbo nga nanukad sa Naval Base Rafael Ramos, Barangay Looc, Lapu-Lapu City.
Milanat og 5 ka adlaw ang maong maritime exercise nga gisugdan niadtong Hulyo 7 (Lunes) hangtod 11 (Biyernes) diin gipangulohan kini sa Naval Forces Central uban ang nagkadaiyang ahensya sa gobyerno sama sa Philippine National Police – Regional Maritime Unit 7, Coast Guard District Central Visayas, Bureau of Customs Cebu, Maritime Industry Authority 7, Office of Civil Defense 7, Bureau of Fisheries and Aquatic Resources 7, ug sa Lapu-Lapu City Disaster Risk Reduction and Management Office.
Kini kay usa ka tinuig nga inter-agency training nga nagtumong sa pagpauswag sa interoperability, pagtukod sa panaghigalaay, ug pagpalambo sa koordinasyon sa mga partisipanteng yunit aron epektibong matubag ang mga mitumaw nga hulga sa kadagatan.
Pipila sa ilang mga aksyong gibansay kay mao ang Visit, Board, Search and Seizure, rescue and assistance, oil spill response, anti-drug trafficking, anti-smuggling, anti-illegal fishing ug uban pa.
Gani sa iyang bahin, mihatag sa iyang mensahi si Cebu Provincial Governor Pamela “Pam” Baricuatro isip Guest of Honor and Speaker sa Closing Ceremony sa maong kalihokan diin mipahayag kini sa iyang pasalamat sa padayong maisog nga pagpanerbisyo sa mga law enforcement units sa pagpanalipod sa kalinaw ug kahapsay sa kadagatan sa Sugbo, Kabisay-an ug nasundong seguridad.
