Gisuspenso ang face-to-face classes sa tanang public ug private schools sa Cebu City sugod gahapong adlawa, hangtod karong adlawa Huwebes, Setyembre 3, tungod sa nagkagrabeng kalidad sa hangin sa Metro Cebu nga nalambigit sa nagpadayong transboundary haze.
Ang suspension sa klase gisunod human misaka ngadto sa 208 ang Air Quality Index (AQI) sa Metro Cebu, nga giklasipikar isip “Very Unhealthy” nga lebel.
Atol usab sa pakighinabi sa Bombo News Team kang Cebu City Councilor Dave Tumulak, tungod sa maong peligro nga gidala sa haze, nakahukom ang mayor nga ipatuman ang pagpahunong ug pagpaliban sa mga outdoor activities alang sa kaluwasan sa mga estudyante, katawhan, ug ilabi na ang mga adunay gihambin nga gibati sa lawas o sakit.
Ug gidasig usab ni Cebu City Mayor Nestor Archival ang mga pribadong kompanya ug opisina nga ikonsiderar ang work-from-home arrangements ug uban pang mga lakang aron mapanalipdan ang mga empleyado batok sa dugay nga pagkaladlad sa peligroso nga polusyon sa hangin.
Samtang, gipahibalo ni Talisay City Mayor Samsam Gullas ang pagsuspenso sa face-to-face classes sa tanang public schools sa Talisay City sugod karong Huwebes, Setiyembre 3.
Matud ni Gullas, gihimo ang maong desisyon human sa koordinasyon sa Department of Education (DepEd) ug sa City Disaster Risk Reduction and Management Office (CDRRMO).
Apan alang sa Talisay City College ug mga private schools, ang desisyon kon magsuspenso ba sa face-to-face classes ihatag ngadto sa tagsa-tagsa nilang school administrators.
Apan gidasig sa mga awtoridad ang publiko nga magpabilin sulod sa balay kutob sa mahimo, magsul-ob og face mask kung mogawas, ug kanunay nga magmonitor sa opisyal nga mga advisory
