CEBU CITY — Nagkasinabot ang mga tigdumala sa Basilica Minore Del Sto. Niño, Inter-Agency Task Force, ug ang Cebu City Government nga ikanselar ang pipila ka mga relihiyosong aktibidad sa nagkaduol nga 456th Fiesta Señor sa Sugbo karong Enero.
Kini human nga miluwat sila og joint advisory kabahin sa simpleng selebrasyon sa kapistahan ni Señor Sto. Niño, taliwa sa COVID-19 pandemic.
Misuporta si Mayor Edgardo Labella sa nahimong desisyon sa mga kaparian sa Basilica diin prayoridad niini ang kaluwasan sa tanan.
Sa maong advisory, lima ka dagkung traditional religious activities ang gikanselar sama sa Penitential Walk with Jesus atol sa Opening Salvo, Penitential Walk with Mary sa katapusang adlaw sa novena, Traslacion sa imahe ni Santo Niño ug Our Lady of Guadalupe, Fluvial Procession, ug hangtud na sa Solemn Foot Procession.
Matud sa rector sa Basilica nga si Fr. Pacifico Nohara Jr. nga ilang giplano ang pagpahigayon og mga provincial Pilgrimages aron kalikayan ang panagtapok sa mga tawo.
Samtang, walay ipahigayun nga motorcade nga mohulip sa nahisgutan nga mga aktibidad apan magpabilin gihapon ang mga Novena Masses.
Napirmahan ang maong joint advisory kagahapon ug gitambongan nilang Rev. Fr. Pacifico Nohara Jr, OSA , Rector sa Basilica Minore del Santo Niño; Councilor Philip Zafra, ang chairman sa Committee on Public Order; Councilor Joel Garganera, ang Deputy Chief Implementer sa IATF Cebu City; Pcol. Josefino Ligan, ang City Director sa Cebu City Police Office; ug Raquel Arce ang pangu sa PROBE. (ekp/gn)
