CEBU CITY- Malampuson nga natapos ang ika-461 nga Fiesta Señor ug Sinulog Festival 2026 nga nakarekord og “zero major incident,” usa ka dakong kalampusan nga gipasidungog sa hugot nga mga protocol sa seguridad ug sa paggamit sa innovative technology sa Police Regional Office 7 (PRO-7).
Sumala kang Police Brigadier General Redrico A. Maranan, Regional Director sa PRO-7 ug Commander sa Task Force Fiesta Señor, bunga kini sa hiniusang paningkamot sa nagkalain-laing law enforcement agencies, boluntaryo, ug partner nga sektor, ilabina human nadani sa pista ang libo-an ka mga deboto ug tumatan-aw nga mitambong sa nag-unang kadalanan sa Dakbayan sa Sugbo.
Usa sa mga giila nga yawi sa kalampusan karong tuiga mao ang unang pagdeploy sa Mobile Command Vehicle (MCV) sa PRO-7.
Ang maong state-of-the-art nga mobile hub nagsilbing sentro o “utok” sa tanang security operations, nga naghatag og real-time monitoring ug walay hunong nga komunikasyon tali sa PNP Command Center, Multi-Agency Coordinating Center (MACC), ug mga Advanced Command Posts.
Sa kasagsagan sa Sinulog Grand Mardi Gras, gipalig-on pag-ayo ang seguridad pinaagi sa pagdeploy sa kapin 8,000 ka personahe nga naglangkob sa Philippine National Police (PNP), Armed Forces of the Philippines (AFP), Bureau of Fire Protection (BFP), Philippine Navy (NAVFORCEN), uban sa mga criminology interns ug student volunteers.
Nagpasalamat kini kang Cebu City Mayor Nestor Archival, Gobernador Pam Baricuatro, ug ang liderato sa Basilica Minore del Sto. Niño tungod sa ilang suporta ug aktibong pakigbahin sa pagmintinar sa kalinaw ug kahusay sa tibuok selebrasyon.
Sa pikas bahin, nagpabilin nga alerto ang PRO-7 aron masiguro ang luwas ug hapsay nga pagbiya sa mga turista ug mga peregrino nga mopauli na sa nagkalain-laing dapit sa Central Visayas.
