Nasikop ang usa ka 27-anyos nga Filipino-American nga si Judd Sanson, kinsang giingong konektado sa Jihadist terror group sa New York City, USA.
Ang suspek miatubang sa Queens Criminal Court sa New York niadtong Lunes.
Matod sa Office of Queens District Attorney Melinda Katz, gidakop sa mga pulis si Sanson atol sa traffic stop niadtong Miyerkules, Hunyo 12 ug gipasakaan kini kaso human naaktuhan nga adunay armas sa iyang sakyanan nga adunay plaka nga obscured.
Nakit-an usab ang suspek nga adunay usa ka awto nga adunay plaka sa bisinidad sa 86th street ug Ditmars sa Queens.
Asoy sa mga otoridad nga importante ang mga lokasyon diin nasigpatan ang suspek gumikan kay adunay 2 ka sakop sa New York Police District sa public safety ang gipusil.
Sa laing bahin, ang abogado ni Sanson nga si Thomas Michael Montella, nibalibad sa presensiya sa media sulod sa courtroom kay nagtuo siya nga dili makiangayon ang paghimo og konklusyon sa kaso sa iyang kliyente kon ang iyang nawong napublikar sa dihang wala pa mapamatud-an ang mga alegasyon ug wala pa nipresentar og ebidensya apan gibalibaran sa huwes ang pagsupak ni Montella.
Gikatakdang susihon sa grand jury kung aduna ba’y igong ebidensiya alang sa trial sa mga kasong kriminal ni Sanson ug kon mao moatubang na usab si Sanson sa korte karong Hulyo 9.
