Ipahigayon karong adlawa, Abril 29, ang katapusang husay sa House Committee on Justice nga nagtumong sa pagtino kung aduna bay probable cause ang mga impeachment complaint batok kang Bise Presidente Sara Duterte.
Kini nga husay sa panel magpokus sa kontrobersyal nga pahayag ni Duterte niadtong 2024, diin iyang gipahibalo sa publiko nga kung adunay mahitabo kaniya, aduna na siyay nakasabot nga patyon sila si President Ferdinand “Bongbong” Marcos Jr., Firsl Lady Liza Araneta-Marcos, ug kanhi House Speaker Martin Romualdez.
Ang online press conference ni Sara Duterte nahitabo sa tungang gabii sa dihang miulbo ang iyang kasuko human gidakop ang iyang chief of staff nga si Zuleika Lopez.
Giimbitar ang National Bureau of Investigation (NBI), nga gipangulohan ni Director Melvin Matibag, aron sa pagpresentar sa House committee sa ilang mga findings human sa imbestigasyon sa giingong hulga sa pagpatay.
Matod pa sa mga nagpasaka sa reklamo, gigamit sa ikaupat nga impeachment complaint ang maong pahayag ni Duterte isip ebidensya.
Gilauman nga ang testimonya sa NBI makatabang sa pagtino kung ang pahayag sa Bise Presidente usa ba ka “credible and actionable threat” ubos sa balaod sa Pilipinas.
Sa samang adlaw, desisyonan usab sa justice panel kung ablihan ba ang selyadong kahon gikan sa Bureau of Internal Revenue (BIR) nga naglangkob sa income tax returns (ITRs) ni Duterte ug sa iyang bana nga si Manases Carpio.
Ang komite nga gipangulohan ni Batangas 2nd District Rep. Gerville Luistro magdeterminar usab kung aduna bay probable cause aron ipasaka sa husay ang ikatulo ug ikaupat nga impeachment complaint, nga giingong nakapasar na sa porma, substansiya, ug basehan.
Kung madayon, gikatakda sa komite ang hearing sa Lunes, Mayo 4, alang sa pag-apruba sa committee report, nga ipasa dayon sa plenaryo sa mao gihapon nga adlaw.
Sa laing bahin, mihangyo ang Office of the Solicitor General sa Korte Suprema nga ibasura ang duha ka petisyon nga nagkuwestiyon sa konstitusyonalidad sa impeachment proceedings batok sa Bise Presidente. Usa sa maong petisyon gisang-at mismo ni Duterte.
Ang Office of the Solicitor General nagrepresentar sa House Committee on Justice sa maong kaso.
