Gikatakdang mohatag og laing hugna sa hinabang pinansyal ang kagamhanan sa Dakbayan sa Sugbo para sa mga senior citizens nga residente niini sa Huwebes, Disyembre 11, 2025.
Naglangkob ang P2,000 nga payout sa mga bulan sa Nobyembre ug Disyembre ubos sa Senior Citizens’ Financial Assistance Program, nga naghatag og P12,000 kada tuig sa mga kwalipikado nga benepisyaryo sumala sa gimando sa City Ordinance 2453.
Sigon ni Mayor Nestor Archival Sr. nga ang pinakabag-o nga pagpagawas nagtumong sa pagpasalig sa mga senior citizen nga sila nagpabilin nga usa sa mga nag-unang prayoridad sa siyudad.
Ang payout sa Disyembre 11 ipahigayon human sa gihimo niadtong Oktubre 25, diin ang City Hall sa katapusan nagpagawas sa dugay nang nalangan nga cash assistance ngadto sa kapin sa 7,700 ka mga senior citizen. diin ang mga benepisyaryo, nga narehistro ug kwalipikado sukad pa niadtong 2013, naghulat na sa ilang tabang sukad pa niadtong Mayo 2024.
Kini human nga giaprobahan sa Konseho sa Dakbayan ang Supplemental Budget 2 (SB2). Ang budget, nga mokabat sa P81.3 milyon para sa mga prayoridad nga programa, naglakip sa P40.8 milyon nga alokasyon nga gigahin para sa Senior Citizens’ Financial Assistance Program.
Aron masiguro ang mas hapsay nga sistema sa umaabot, si Mayor Archival nag-isyu og bag-ong executive order (EO) nga nagtukod og updated nga mga giya sa distribusyon.
Gipalig-on pag-usab sa EO ang pasalig sa Siyudad sa City Ordinance 2453 ug nagtinguha sa pagtukod og usa ka “klaro, episyente, transparent, ug regular nga mekanismo” para sa tukma sa panahon nga pagpagawas sa mga pundo.
