Walay natala nga bisan usa ka insidente sa krimen sa fluvial parade sa ika-461 nga pagselebrar sa Fiesta Señor ug Sinulog Festival gahapon Enero 17, 2026, human masiguro sa Police Regional Office 7 (PRO7) ang maayong pagdumala, kalinaw, ug seguridad sa selebrasyon.
Personal nga gibantayan ni PBGEN Redrico Atienza Maranan, Regional Director sa PRO7, ang seguridad sa fluvial procession, ilabi na sa mga dalan sa tubig, pantalan, ug mga pangunahing lugar nga tinipunan sa tawo, aron masiguro ang kaluwasan sa libo-libong deboto nga mitambong sa relihiyosong kalihokan.
Gipatuman sa PRO7 ang command and control operations gamit ang ilang modernong Communication Vehicle, nga nagsilbing sentro sa real-time monitoring ug koordinasyon sa mga deployed nga yunit, hinungdan nga dali ra ang pagtubag sa bisan unsang sitwasyon.
Sumala sa PRO7, ang zero crime incidence resulta sa maagang pagpangandam, intelligence-led deployment, ug hugot nga koordinasyon sa mga lokal nga gobyerno, partner agencies, force multipliers, ug mga boluntaryo nga nakapuwesto sa mga ruta sa dagat, pantalan, ug mga pangunahing lugar sa publiko.
Gipalig-on usab sa PRO7 nga ang ilang tumong sa pagsiguro sa kalinaw ug seguridad dili lang makita apan tinuod nga mabati sa publiko, labi na sa panahon sa dagkong kultural ug panrelihiyosong kalihokan.
