Misamot pa karon ang kakulba ug kahinam sa mga football fans sa United Kingdom (UK) dungan sa pagsugod sa makasaysayanong Round of 16 sa nagpadayong FIFA World Cup 2026.
Sa pakighinabi sa Bombo Radyo Cebu kang Ardyll Virtudazo, ang Bombo International Correspondent sa United Kingdom, gibutyag niini nga anaa na sa “football fever” ang tibuok nasod, ilabi na human sa kulbahinam nga kadaugan sa England batok sa DR Congo (2-1) sa miaging Round of 32 pinaagi sa mga krusyal nga goal sa ilang kapitan nga si Harry Kane.
Tungod niini, pormal nga miabante ang England ngadto sa Last 16 diin gikatakda nilang ikasangka ang lig-ong defending co-host nga Mexico didto mismo sa makasaysayanong Estadio Azteca sa Mexico City karong umaabot nga Hulyo 5 (oras sa Amerika) o Hulyo 6.
Gisaysay usab ni Virtudazo nga malaumon ang mga supporters nga makaabante sa sunod nga hugna, ingon man nga makahatag usab og nindot nga duwa gumikan sa mga naunang gipakita nga intense performance.
Gawas sa sangka sa England ug Mexico, gipanglantawan usab sa mga fans sa UK ang uban pang dako ug eksplosibong engkwentro sa Round of 16.
