Cebu City – Midangop sa estasyon sa Bombo Radyo Cebu ang usa ka French National tungod matud pa nabiktima kini sa scam sa kaugalingon mismong asawa.
Giila ang French National nga si Thierry Vatelier samtang ang asawa niini mao si Razel Cañedo Vatelier nga giisip nga big time ‘Ponzi schemer’.
Pagsaysay sa French National sa Bombo Radyo Cebu nga mibakasyon kini sa Cebu niadtong Sinulog Festival para kauban ang asawa og nagdala kini og kwarta nga nagkantidad og 20,000 US Dollar kun dul-an usa ka milyon ka pesos. Apan kalit lang matud pa kining nahanawa lakip na ang iyang asawa.
Nasayran niini nga dunay gipamalit nga properties ang iyang asawa sa Sugbo ug gipangalan sa laing tao hinungdan nga nag-away ang duha nga misangpot usab sa pagkilab ni Razel.
Gusto na nga mubalik sa America ni Thierry para mutrabaho isip chef apan namroblema kini karon tungod kay wala na kini kwarta. Una na usab kini nga midangop sa NBI ug sa PNP diin napa blotter na ang nahitabo kaniya apan wala kini makontento sa maong tabang hinungdan nga midangop kini sa buhatan sa Bombo Radyo.
Nasayran nga si Razel Cañedo usa ka ex-convict nga nasikop niadtong tuig 2013 sa Atlantic City, New Jersey, USA sa kaso nga mail fraud ug wire fraud.
Target niini ang mga migrant nga pinoy kung diin awhagon niini nga mu-invest sa iyang “nanny service and nursing agency business” sa saad nga makatabang kini sa mga Pilipino nga nurse nga gustong mutrabaho sa US.
Padayong gikuha sa Bombo Radyo Cebu ang pamahayag ni Razel Cañedo ug padayong abli ang sibyaanan alang sa pagpadayag sa iyang habig.
