Midepensa sa ilang mga titulo sa elite category sa National Age Group Triathlon ang mga garbo sa Sugbo nga sila si Andrew Kim Remolino ug Raven Faith Alcoseba diin gipahigayon sa Subic Bay Metropolitan Authority Freeport Boardwalk sa Zambales niadtong Domingo, Enero 26, 2025.
Diin si Remolino, kay usa ka second-year marketing student sa University of San Carlos, nga mioras og 56 minutos ug 46 segundos aron mapabilin ang men’s title.
Samtang si Alcoseba kay misumiter sa labing maayong oras nga 1:05:19 aron makuha ang iyang ikaupat nga sunodsunod nga women’s title sa kalihokan nga gipasiugdahan sa Triathlon Philippines, pinangulohan ni Tom Carrasco.
Sa pakighinabi sa Bombo Radyo Cebu kang Remolino gipaambit niini nga ila kining gipangandaman sa mga milabay nga katuigan hilabi na nga mao kini ang usa sa mga qualifying races sa umaabot nga Southeast Asian Games o SEA Games karong Disyembre.
Ingon man nga tungod usab nga duha ka slots lang alang sa Pilipinas sa Triathlon individual.
Sa pagkakaron, padayon gihapon ang ilang pagpangandam ug pagsalmot sa mga umaabot nga mga races diin karon kay nakapokus sila sa qualifying races ning tunga sa tuig.
Ingon man nga gawas sa mga regional ug national races kay plano usab sa kaulohan nga ipadala sila sa Hongkong alang sa international event sa buwan sa Abril.
