Niabot pa sa overtime ang Gilas Pilipinas aron pildihon ang Saudi Arabia sa iskor nga 95-88 sa 2025 FIBA Asia Cup.
Sa kadaugan, makaabante na sila sa quarterfinals diin ilang ikasangka ang Australia.
Sa nahisgutang duwa, dako nga hagit ang nasugatan sa Gilas tungod sa pagkawala nila Calvin Oftana nga nakahiagom og ankle injury ug CJ Perez nga naangol usab sa ikaduhang kuwarter.
Ingon man sa unang bahin sa unang kuwarter, gidominar sa Gilas Pilipinas ang duwa diin niabot og 10 puntos ang bintaha apan wala mohunong ang Saudi Arabia ug napugos kini sa pagpaduol sa duwa.
Apan, gipakita ni Justin Brownlee ang ‘never say die’ nga kinaiya human miiskor sa iyang three-pointer sa nahabiling 3.7 segundos sa kataposang kwarter, hinungdan ang duwa natabla sa 79-tanan aron masulod sa overtime.
Sa pagsulod sa overtime, sila si Kevin Quiambao, Dwight Ramos ug Brownlee nagtinabangay aron hingpit nga mapildi ang host country.
Gipangulohan ni Brownlee ang kadaugan sa Gilas Pilipnas pinaagi sa iyang 29 puntos, upat ka rebounds ug lima ka assists.| Bombo El Jonah Cañete
