Gibarugan ni Akbayan Party-list Rep. Pervical “Percy” Cendaña ang iyahang nahimong pamahayag, diin niingun siya nga “nakakalula” o makalibog ang mga numero o kantidad nga napresentar atol sa Committee on Justice hearing kabahin sa impeachment complaint nga gipasaka kang VP Sara Duterte.
Matod ni Cendaña, tinuod gayud nga makalibog ang mga kantidad nga nisulod sa bank account sa bise presidente, gani niabot kini og bilyon-bilyon na nga kantidad.
Mao kini ang gikabutyag ni Cendaña atol sa eksklusibong pakighinabi sa Bombo Radyo Cebu news team kaniya, ug matod pa, basehan kadtong hearing gahapon nga giilad ra sa pamilyang Duterte ang mga katawhang Pilipino.
Bisan pa nga iladlad sa pamilyang Duterte nga simple ra ang kinabuhi niini, mokaon ra sa karenderya, apan sukwahi kini tungod kay kapiluon ang milyones nga nisulod sa mga bank accounts niini.
Gihimug-atan ni Cendaña nga ang mas nakahatag og tumang alarma niini mao ang giingong mga salapi nga gituohang gikan sa mga drug lord, nga nagpasabot nidawat diay og drug money ang pamilyang Duterte.
Dugang pamahayag ni Cendaña, basi sa mga nanggawas nga datos sa hearing kagahapon, usa na kining basehan sa probable cause sa impeachment sa bise presidente, ilabi na sa testamento niini nga giingong walay kamatuoran kabahin sa iyahang SALN, wala motukma sa iyahang pamahayag sa milabayng tuig nga wala kini cash on hand ug cash deposit.
Gumikan kay sa dihang gilili na suspicious and covered transactions, milyon-milyon man diay ang gideposito nga mga kantidad.
