Gipasirad-an sa mga sakop sa kapulisan ang opisina sa giingong nag-operate og scam hub nga nahimutang sa Brgy. Kasambagan, Cebu City.
Kini human sa ilang pag-ronda sa maong building diin na-hack sa usa ka hacker ang CCTV footage sa maong edipisyo ug gibulabog ang tunghay nga pagpanglimbog sa mga agent sa ilang mga clients.
Atol sa gipahigayon nga operasyon, nasayran sa kapulisan ug ubang Law Enforcement Agencies nga wala’y business permit gikan sa Business Process Licensing Office hinungdan nga ila kining gipasira ang maong kompaniya.
Gawas niana, naabtan usab nila ang pipila ka mga kabtangan sa mga mibiya nga agent ug mga computers nga gituohang maoy gigamit sa pagpang-scam nga ipaubos sa pagsusi.
Giisyuhan na usab kini og search warrant gikan sa korte aron mapalawman pa ang imbestigasyohn kon unsa ang tinud-anay nga ‘nature’ sa ilang operasyon ug unsa ang posible nilang mga kalapasan sa balaod.
Subay niini, nanawagan si PBGen. Redrico Maranan, Regional Director sa PRO-7 nga hunongan na sa mga cyber hackers ang ilang operasyon, tungod kay ang mga katawhan adunay alamag sa mga panghitabo, ug nanghinaot usab kini nga tabangan sila sa mga IT experts sa susamang kaso.
Mipasalig usab kini nga gukdon sa mga sakop sa kapulisan ang nalambigit sa maong pagpangilad. | Bombo Nathaniel Sandoval
