Gisusi ni Cebu Governor Pamela Baricuatro ang giingong “VIP” treatment nga gihatag ngadto sa kanhing consultant sa Kapitolyo nga si Byron Garcia human sa pagkasikop niini niadtong Hunyo 11, 2026.
Hinungdan nga nangayo og katin-awan ang gobernadora kon giunsa niini kapaspas ang pagka-admit sa tambalanan.
Gikuwestiyon sa gobernador kon nganong nakasulod dayon si Garcia sa ospital sa sulod lang sa wala pa mag-usa ka oras, samtang ang ubang mga pasyente, bisan kadtong mga “brain dead” na, naglisod man gani sa pagsulod.
Nahitabo ang maong medical transfer niadtong Biyernes, Hunyo 12, usa ka adlaw sa dili pa nakapiyansa si Garcia niadtong Sabado, Hunyo 13, alang sa iyang kasong gender-based online sexual harassment.
Base sa post ni Garcia, gidala siya sa Talisay District Hospital sa may alas 4:30 sa hapon pinaagi sa dinalian nga tabang sa Talisay Rescue Emergency Assistance Team, ug gibalhin ra usab dayon sa Vicente Sotto Memorial Medical Center tungod sa giingon niyang maltreatment o dili maayong pagtratar sa kapulisan samtang gipasubay usab ang iyang kondisyon isip usa ka 65-anyos nga senior citizen nga adunay “poorly controlled diabetes” nga natanggong sa gamay ug kahuot nga selda kauban ang 32 ka laing priso.
Samtang sa dihang gipangutana sa media ang gobernador mahitungod sa regional electronic referral system sa mga district hospital ug sa mga ospital nga gidumala sa gobyerno, natingala kini ug niasoy nga mas maayong pangutan-on si DVSMMC Medical Center Chief Dr. Gerardo Aquino niini.
Apan, gikabutyag niya nga naningkamot siya nga makontak si Aquino apan wala pa siyay nadawat nga tubag, aron unta ipasabot ang mga sirkumstansya sa pag-admit ni Garcia.
