PROVINCE OF CEBU- Mipadayag sa tumang kasubo si Gobernador Pamela Baricuatro sa kahimtang karon sa probinsya, nga iyang gihulagway nga “gubot, guba, gutom”, sa iyang unang State of the Province Address (SOPA) nga gipahigayon niadtong Biyernes, Agosto 29, 2025.
Matod sa gobernador, ang maong hulagway dili lamang usa ka emosyonal nga pagbati, kundili usa ka tinuod nga refleksyon sa kasamtangang realidad nga nag-atubang sa probinsya, ilabi na sa sektor sa kahimsog.
Gitumbok ni Baricuatro ang kakulang sa mga tambalanan nga gidumala sa Kapitolyo, nga matod niya usa ka lig-on nga ehemplo sa dugay nang kakuwang sa maayong pagdumala ug prioridad sa serbisyo publiko.
Gidugang niini, nga sa iyang personal nga paglibot sa 16 ka provincial ug district hospitals, nasaksihan sa gobernador ang kabangis sa kondisyon sa mga pasilidad, nga kulang bisan sa labing sukaranan nga mga gamit medikal.
Sa pipila ka ospital,apil ang yano nga gapas kinahanglan bayran sa pasyente, usa ka hulagway sa kakulang sa libreng serbisyong medikal nga angay unta ihatag sa katawhan.
Gipasiugda sa gobernador ang dinaliang panginahanglan sa komprehensibong reporma sa health care system, uban sa tinguha nga ibalik ang dignidad, integridad, ug tinuod nga serbisyo publiko sa mga tawo.
Gilauman nga mosunod ang konkretong mga lakang sa mga umaabot nga adlaw aron masugdan ang mga repormang gisaaran sa iyang administrasyon.
