CEBU CITY — Modangop si Cebu Provincial Governor Gwendolyn Garcia ngadto sa mga eksperto kabahin sa nahimong medical interventions ngadto nilang kanhi-Dumanjug Mayor Nelson Garcia ug Barili Mayor Marlon Garcia, kinsang namatay gumikan sa mga kakulian sa lawas.
Una nang gihimug-atan sa gobernadora nga dili COVID-19 ang hinungdan sa kamatayon sa duha sanglit nangaayo niini.
Base sa ilang mga death certificate, nitaliwan si Mayor Marlon Garcia gumikan sa septic shock nga dala sa pneumonia, samtang cardiac arrest ang gikamatyan ni Mayor Nelson Garcia.
Matud ni Garcia nga gusto nilang matino pinaagi sa mga eksperto kung unsa man ang nahitabo sa iyang mga manghud.
Emosyonal nga gisaysay sa gobernadora ang gipas-an nga kalbaryo sa pamilya diin mokabat ngadto sa milyones ang hospital bill sa dihang nalandig sa tambalanan ang managsuon.
Hinuon midepensa ang pamilyang Garcia nga gusto lang nilang matubag sa tambalanan ang ilang mga pangutana ug musunod ang dugang nilang lakang.
Kahinumduman nga namatay si Mayor Nelson niadtong Setyembre 1 ug gisundan kini ni Mayor Marlon niadtong Septembre 6 ning kasamtangang tuig. /report by Bombo Eric Amaro/GN
