Gihangop ni Gobernador Pamela Baricuatro ang Kapitolyo sa Probinsiya sa Sugbo isip temporaryong buhatan sa bag-ong natukod nga Independent Commission for Infrastructure (ICI).
Ang tanyag gihimo niadtong Biyernes, Septiyembre 12, 2025, usa ka adlaw human gipirmahan ni Presidente Ferdinand Marcos Jr. ang executive order nga nagmugna sa independente nga komisyon.
Gitahasan ang ICI usa ka fact-finding body sa pag-imbestigar sa korapsyon ug mga iregularidad sa mga proyekto sa gobyerno sa flood control project.
Ang tanyag ni Baricuatro pinaagi sa iyang personal nga social media account, diin ang gobernadora mipahayag ug suporta alang sa National Government’s anti-corruption drive.
Si Baricuatro, kinsa nagpaila sa iyang kaugalingon nga usa ka anti-corruption advocate, nagtuo sa usa ka gobyerno nga “limpyo, bukas, ug makiangayon.”
Sa iyang pamahayag, gipamatud-an sa gobernador ang iyang kaandam nga makiglambigit sa pagpakigbatok sa korapsiyon.
Miapelar usab kini alang sa malinawon nga mga protesta, paglikay sa violence ug dili pagguba sa mga kabtangan.
Kahinumdoman nga gipirmahan ni Marcos ang Executive Order 94 aron paghimo sa ICI aron matubag ang nagkadako nga kabalaka sa publiko sa korapsyon sa mga government projects.
