CEBU CITY-Padayon ang hot pursuit operation karon sa 3 ka mga suspect sa pagpatay sa usa ka Grade 10 student sa may Sitio Banilad, Brgy. Tomonoy Lungsod sa Moalboal kagahapon.
Naila ang biktima nga si Hariz Olivo, 21 anyos.
Gibutyag ni Police Corporal Wilfredo Rosal sa Moalboal Police Station nga duna na silay gisundan karon nga suspect nga posibleng maoy mibuhat sa krimen basi na usab sa nakakita.
Una niini, nakadawat og tawag ang Police station gikan sa usa ka concern citizen nga matud pa naay napalgang patay nga lalaki sa naasoy nga lugar.
Pagresponde sa kapulisan, nakita nalang niini ang batan-on nga nagbuy-od sa yuta, walay pang-ibabaw nga bisti ug napuno sa bun-og ang lawas.
Nakita usab sa kilid sa biktim ang usa ka martilyo ug duna usab kini samad sa iyang ulo nga gitoohang gipukpok sa martilyo.
Nasuta nga gipangita na ang biktima sa iyang ginikanan niadtong petsa 3 tungod kay wala na kini ma-uli apan pagkabuntag sa petsa 4, kagahapon napalgan nalang kining wala nay kinabuhi.
