CEBU – Nangayo og pasaylo sa ilang mga kasaypanan ang usa ka grupo sa mga batan-on nga nakuhaan sa camera nga nagguba sa mga dekorasyon sa Pasko sa Barangay Cogon niadtong Miyerkules, Nobyembre 16, 2022.
Gikompirmar kini ni Police Major Michael Gingoyon, hepe sa Cordova Police Station, sanglit makita usab sa video gikan sa Cordova PIO ang grupo nga nangayo og pasaylo sa ilang binuhatan.
Nahitabo ang insidente niadtong Domingo sa kaadlawon, Nobyembre 13, diin nakit-an ang mga suspek sa usa ka video nga nagguba sa mga dekorasyon sa Pasko sa nahisgutang barangay.
Naabot sa kapulisan ang video hinungdan nga nihimo sila og follow-up operation batok sa mga suspek ug niadtong Miyerkules sa buntag, Nobiyembre 16, boluntaryong mitahan ang mga suspek ngadto sa Cordova Police Station aron mangayo og pasaylo sa ilang nahimo.
Nasayran nga pulos naka-inom ang mga suspek ug gikatahong gi-tripan ang usa ka Christmas tree sa naasoyng barangay dayon gikuhaan og video apan aduna usa nga miyembro sa ilahang group chat ang nitraydor hinungdan nga mikaylap ang moang video.
Matod pa ni Gingoyon nga mopasaka unta og kasong malicious mischief si Cogon Barangay Kapitan Francisco Ando batok sa mga suspek apan ila nang gihusay ang isyu.
Gawas niini, nagkasabot usab sila nga mopatuman og proyekto nga pagasalmotan sa mga suspek.
