CEBU CITY — Nabalhog sa prisuhan ang usa ka habalhabal driver kinsang gituohang midunggab-patay sa laing habalhabal driver sa may Brgy. Poblacion, sa lungsod sa Compostela, sa Sugbo.
Giila ang biktima nga si Lenie Ochea Noval, 35 anyos, nagpuyo sa Brgy. Basak, sa susamang lungsod samtang ang suspek mao si Joshua Canlas, 27 anyos.
Matud ni Police Chief Master Sergeant Lary Fernandez sa Compostela Police Station nga sa dihang nahuman na og kaon si Noval sa usa ka kan-anan, kalit kining gi-away ni Canlas.
Base sa pasiunang imbestigasyon nga padung na unta momaneho si Noval sa iyang motor apan gipahunong kini ni Canlas ug gibukbok kini sa barkada.
Gumikan sa, matud pa, nagkainit nga tensyon giingong nakahigayon og dunggab si Canlas gamit ang kutsilyo.
Gidala dayon sa tambalanan ang biktima human kini nakaangkon og samad-dinunggaban sa iyang dughan apan dead on arrival na kini.
Nasikop dayon si Canlas sa Brgy. Inayawan sa dakbayan sa Sugbo atol sa hot pursuit operation sa Compostela Police Station.
Dugang pa ni Fernandez nga anaa sa selos o may kalabutan sa trabaho ang gilantaw nga mga motibo sa kamatayon ni Noval.
Anaa sa Compostela detention cell ang dinakpan nga si Canlas samtang hikayon pa sa kapulisan ang kasong ipasaka batok kaniya.
