Gisupak sa mga prosecutors sa International Criminal Court (ICC) ang hangyo sa kampo ni kanhi Presidente Rodrigo Duterte nga i-disqualify ang duha ka huwes sa pagdesisyon sa isyu sa hurisdiksyon sa tribunal sa kaso sa kanhi Presidente.
Sa sayo pa, ang lead counsel ni Duterte nga si Nicholas Kaufman, niadtong Mayo 2 mihangyo sa ICC nga i-disqualify sila si Pre-Trial Chamber I Judges Reine Adélaïde Sophie Alapini-Gansou ug María del Socorro Flores Liera gikan sa pagdesisyon sa ilang gikuwestiyon nga hurisdiksyon sa korte sa kaso ni Duterte.
Gitataw usab sa kampo sa kanhi Presidente nga pinaagi sa pag-disqualify sa duha ka huwes, maprotektahan ang katungod ni Duterte sa “impartial trial”.
Apan, sa tubag nga gipagawas sa ICC prosecutors niadtong Mayo 22, pormal nga gibasura ni deputy prosecutor Mame Mandiaye Niang, nga nagrepresentar sa Office of the Prosecutor, ang hangyo sa kampo ni Duterte tungod kay daw napakyas ang defense team sa pagpamatuod nga nagpakita og bias ang 2 ka huwes.
Sukwahi sa baruganan sa defense team, wala pa matino sa mga huwes ang resulta o wala pa makadesisyon sa panaglalis bahin sa hurisdiksyon pabor sa prosekusyon.
Sila si Gansou ug Liera kabahin sa chamber nga nagtugot sa ICC prosecutor sa pag-abli sa imbestigasyon sa war on drugs batok kang kanhi Presidente Duterte niadtong 2021 ug sa pagpadayon sa gisuspinde nga imbestigasyon niadtong 2023.
Sa pagkakaron, ang kanhi Presidente nagpabiling natanggong sa The Hague, Netherlands samtang nagpaabot sa kumpirmasyon sa mga kaso batok kaniya tungod sa mga krimen batok sa katawhan nga may kalabutan sa dugoong gubat batok sa droga nga gitakda sa Setyembre.
