CENTRAL VISAYAS- Nakaplagang patay ang usa ka High-Value Individual(HVI) nga gituohang durugista human nga gihulos niini ang kaugalingong kinabuhi sulod sa selda sa Philippine Drug Enforcement Agency(PDEA7) nga nahimutang sa Brgy.Lahug, Cebu City.
Giila ang nakabsan nga si Juan, 39 anyos, minyo, manindahay og utanon, taga Brgy.Mantalungon , Lungsod sa Dalaguete Probinsiya sa Sugbo.
Subay niini, nipagawas og pamahayag ang PDEA 7, kung diin matud sa buhatan niadtong Marso 22, 2025, mga alas 2:20 sa kaadlawon, usa ka piniriso nga giilang si alyas Juan, temporaryong gitanggong sa PDEA 7 detention facility sa Lahug, dakbayan sa Sugbo, napalgang naghikog sulod sa comfort room sa detention facility.
Ang mga guwardiya sa prisohan gialarma sa laing piniriso nga nakadiskubre kang alyas Juan sulod sa CR.
Nipahigayon dayon og first aid ug cardiopulmonary resuscitation (CPR) aron mabuhi ang dinakpan ug nanawagan dayon sila og medikal nga tabang.
Kini nakuhaan sa video pinaagi sa mga CCTV nga gibutang sa sulod sa pasilidad.
Dugang pa, gi-report sa mga duty officer sa PDEA 7 ang insidente ngadto sa Cebu City Police Office Station 4.
Gikompirmar sa mga personahe sa PNP Regional Forensic Unit 7 ang kamatayon, diin nakuhaan og “farewell note” ang forensic team.
Ang patay’ng lawas gidala sa punerarya sa dakbayan sa Mandaue ug ipaubos sa autopsy sa PNP.
Nakigkita na ang mga sakop sa PDEA 7 sa pamilya ni alyas Juan ug nipasalig nga hingpit nga makig-alayon ang Opisina sa PNP sa ilang padayon nga imbestigasyon.
Nasuta nga kini nasikop niadtong Marso 19, 2025, sa mga personahe sa PDEA Cebu Provincial Office atol sa buy-bust operation sa Barangay Mantalongon, Dalaguete, Cebu.
Sa record check, si alyas Juan una nang nasikop sa PNP niadtong Disyembre 2020.
