Gihinaot ni House Minority Leader Marcelino Libanan kang Presidente Ferdinand “Bongbong” Marcos Jr. nga unahon ang pagpasar sa National Land-Use Law tungod sa kadaot nga gipahinabo sa Bagyong Tino sa Central Visayas, ilabina sa Metro Cebu.
Sumala ni Libanan, ang bagyo nagbutyag sa problema sa atong pagplano sa paggamit sa yuta ug pagpangandam sa katalagman.
Miingon siya nga ang hustong paggamit sa yuta importante aron makunhuran ang risgo sa katalagman, mahimong lig-on sa pagbag-o sa klima, ug mapanalipdan ang kalikupan.
Dugang pa nga ang pagtukod og mga balay kinahanglan nga hunongon sa mga lugar nga daling mabahaan o madahili ang yuta.
Dugang niya nga ang mas kusog nga mga bagyo moabot, busa gikinahanglan ang mga balaod aron dali kitang makapangandam alang sa pagbag-o sa klima.
Ang National Land-Use Law mao ang giya sa paggamit ug pagpanalipod sa kayutaan sa nasud.
