CEBU CITY- Andam na ang House panel of prosecutors sa ilang mga testigo, dokumento, ug mga abogado alang sa umaabot nga pre-trial conference karong Huwebes, Hunyo 18, 2026.
Gihatagan og gibug-aton ni Lanao del Sur Representative Zia Alonto Adiong, tigpamaba sa House prosecution panel, nga usa ka “kritikal nga yugto” kini aron maseguro ang mas paspas ug organisadong pagdagan sa impeachment case batok kang Vice President Sara Duterte.
Sa usa ka interview sa Bombo Radyo Cebu, gipasabot ni Adiong nga dako og tabang ang maong proseso sa korte aron mamenosan ang kalibog ug mapugngan ang posibleng kalangan sa sunod nga mga hearing.
Matud pa niya, pinaagi sa pre-trial conference, mas mahimong episyente ang pagdagan sa kaso tungod kay daan nang klaro ang direksyon ug nahan-ay na ang mga ebidensya nga ipresentar sa matag kampo.
Ang maong preparatory proceedings nagpakita usab sa kabug-at sa kaso, human mahibal-an nga kapin sa 20 ka mga abogado ang nagtinabangay sa prosecution panel alang sa pag-organisa sa mga dokumento ug ebidensya.
Lakip sa gilauman nga testigo nga isumiter sa prosecution mao ang mga imbestigador gikan sa National Bureau of Investigation (NBI) nga misusi sa alegasyong “grave threats” batok sa Presidente, First Lady, ug House Speaker ubos sa Article 3 sa Articles of Impeachment.
Tungod niini, naglaom ang mga prosecutors nga tubagon na sa kampo ni Bise Presidente Sara Duterte ang maong mga bug-at nga pasangil.
Ang maong listahan magsilbi usab nga basehan sa depensa sa pag-andam sa ilang counter-arguments.
Sa pagkakaron, padayon ang pag-repaso sa mga dokumento ug testimonya nga gamiton sa aktuwal nga pagbistay samtang nagpaabot pa ang tanang kampo sa pinal nga iskedyul gikan sa Senate Impeachment Court.
