Pipila sa mga sakop sa Young Guns sa Kamara kay kusganong mihimakak nga adunay kalambigitan sa giingong pagpasaka sa 4th impeachment complaint batok kang VP Sara Duterte.
Nunot kini sa mitumaw nga impormasyon nga adunay mipasaka sa ikaupat nga impeachment complaint batok sa bise presidente diin pipila ka mga magbabalaod nga sakop sa majority bloc ang mopasaka niini.
Matod ni Zambales Rep. Jay Khonghun walay aksyon sa bahin sa Young Guns alang sa laing impeachment complaint.
Wala usab impormasyon bahin niini si Lanao del Sur Rep. Zia Alonto Adiong ug matud pa nga wala siya’y ideya bahin niini tungod kay busy usab siya pagkahuman sa pagkamatay sa iyang inahan.
Dugang ni Tingog party-list Rep. Jude Acidre, bag-o lang siyang niabot sa Pilipinas ug wala siyay nadawat nga balita bahin sa pagpasaka sa reklamo.
Bisan si 1-Rider party-list Rep. Rodge Gutierrez nga sakop sa Young Guns ug kabahin sa minoriya wala usab kahibalo sa giingong ikaupat nga impeachment complaint.
Ingon man nga wala niya makita ang miaging tulo ka reklamo nga gipasaka batok sa bise presidente.
Una nang gipahibalo ni House Secretary General Reginald Velasco nga adunay mopasaka og impeachment complaint nga pangulohan sa 10 ngadto sa 12 ka mga magbabalaod gikan sa majority ug minority.
