Gikondenar ni House Speaker Martin Romualdez ang pasidaan sa China sa pagdakop ug pagtanggong sa mga langyaw nga nagpatrolya sa West Philippine Sea (WPS).
Matod sa lider sa Kamara, ang maong pamahayag sa China makapasamot sa tensiyon ug supak usab sa international law ug mga establisemento nga polisiya nga gisunod sa Pilipinas ug ubang kanasuran nga nangangkon og teritoryo sa maong bahin sa kadagatan.
Giinsister niini nga pakigbisogan sa Kamara ang soberanya ug ang katungod sa katawhang Pilipino ug dili tugotan ang China nga dakpon ang mga kababayan sama sa mga mananagat nga anaa sa kaugalingong exclusive economic zone (EEZ).
Mao kini ang unod sa mensahe ni Romualdez human ang South China Morning Post mitaho nga gihatagan sa Chinese Government ang China Coast Guard og gahom sa pagdakop ni bisan kinsa nga mosulod sa gibantayang teritoryo lakip na ang gikaaway nga teritoryo sa WPS.
Kalabot niini, ang opisyal miinsister ngadto sa China nga respetuhon ang Arbitral ruling, nga giila usab sa mga nasud sa kalibutan nga nag-ingon nga ang Pilipinas adunay katungod sa WPS.
