Nagbangutan ang pamilya sa tulo ka menor de edad nga mga bata, pulos mga lalaki, human sila gisunog sa ilahang kaugalingong inahan sa Bulacan.
Giila ang inahan sa mga bata nga si alyas “Joyce” ug iyahang bana nga si Kim Apero, residente sa Brgy. Managupaya, Banate, Iloilo, ug apo sa kaniadtong Brgy. kapitan sa nahisgutang lugar.
Sa pakighinabi sa Bombo Radyo Koronadal ni Lea Allado Silahis, iyaan sa amahan sa mga bata, grabi ang iyahang kasagmuyo sa mga naagian sa iyang mga apo.
Tataw ni Silahis, gikadena sa maong inahan ang iyang duha ka mga anak sulod sa comfort room ug gikandadohan kini.
Samtang, gibubu-an sa inahan usab og gas ang higdaanan sa iyang kinamanghurang anak ug gisunog kini, diin mao usab ang hinungdan nga nasunog ang kinatibuk-ang balay niini.
Sumala ni Silahis, diha diha dayon nangamatay ang ikaduha ug ikatulong mga anak niini, samtang ang kinamanghurang anak, nadala pa sa tambalanan, diin nakalitok pa kini og “I Love You Daddy” ngadto sa iyahang amahan, sa wala pa kini nipahuway sa hingpit.
Dugang usab ni Silahis, nadunggan usab niya nga adunay mga estorya nga adunay sakit sa pangutok ang maong suspek, diin gitoohan nila nga mao ang usa sa hinungdan sa maong krimen.(Bombo Irene Ardiente)
