Gikatakdang magpahigayon ang Trial Chamber III sa International Criminal Court (ICC) og status conference kalabot sa kaso nga crimes against humanity batok kang kanhi Presidente Rodrigo Duterte karong Miyerkules, Setyembre 16.
Magsugod kini sa alas 4:30 sa hapon, oras sa Pilipinas.
Atol niining ikatulo nga status conference, hisgotan sa chamber ang pipila ka mga butang, sama sa listahan sa mga saksi, listahan sa mga ebidensya, mga dokumento o impormasyon nga ipadayag ngadto sa depensa, ug pipila ka mga posibleng insidente.
Hisgotan usab ang iskedyul sa mismong husay sa kaso—nga gikatakdang magsugod sa Nobyembre 30—lakip na ang sugyot alang sa sunod-sunod nga mga hearing nga adunay gitakdang mga break ug oras sa sesyon.
Dili pa sigurado kung personal nga motambong ang kanhi president, apan, gikinahanglan siyang moatubang sa mga maghuhukom sa ICC human sa iyang pagkaaresto sa Marso 2025.
