Misumite na ang Office of the Prosecutor sa International Criminal Court (ICC) og listahan sa mga saksi ug ebidensya kalabot sa kaso batok kang kanhi President Rodrigo Duterte.
Ang tulo ka pahina nga confidential document, nga naglangkob sa listahan sa mga saksi ug ebidensya, gisumite sa Office of the Prosecutor ngadto sa Trial Chamber III.
Ubos sa Regulation 23bis (1) sa Regulations of the Court, gi-file nga confidential ang maong mga dokumento tungod kay adunay sensitibong impormasyon nga may kalabotan sa mga saksi.
Si Duterte nag-atubang og tulo ka ihap sa krimen batok sa katawhan nga may kalabotan sa iyang kampanya batok sa ilegal nga droga atol sa iyang pagkapangulo sa Pilipinas.
Base sa mga rekord sa gobyerno, kapin 6,000 ka mga tawo ang namatay sa operasyon batok sa ilegal nga droga.
Apan, mas taas ang ihap nga gikutlo sa mga grupo sa tawhanong katungod.
Gilauman nga magsugod ang trial ni Duterte sa Nobyembre atubangan sa ICC.
