Gikompirmar sa pamilya sa biktima nga usa ka Pinay immigrant ang asawa sa federal immigration officer nga namusil ug nakapatay sa 37-anyos nga si Renee Nicole Good didto sa Minneapolis kaniadtong Miyerkules.
Giila ang opisyal nga si Jonathan Ross, 43-anyos, usa ka Enforcement and Removal Operations (ERO) agent sa U.S. Immigration and Customs Enforcement (ICE), diin matod sa amahan ni Ross, ang 38-anyos nga asawa niini natawo sa mga ginikanan nga kasamtangang nagpuyo pa sa Pilipinas, apan usa na kini karon ka hingpit nga American citizen.
Gihulagway sa mga silingan ang asawa ni Ross nga matinahuron, mahigalaon nga layo ra kaayo sa hilumon ug reserved nga personalidad sa maong opisyal, samtang ang magtiayon naminyo sukad pa niadtong Agosto 2012 ug duna na silay mga anak.
Subay sa hisgutanan, nahitabo ang maong insidente niadtong Enero 7, 2026, samtang gipahigayon ang usa ka federal immigration operation diin gipusil ni Ross ang sasakyan ni Good tungod sa pagtuo nga nagdala kini og hulga.
Apan mitumaw ang mga video sa hitabo nga naghatag og mga pangutana kon makatarunganon ba ang paggamit sa nakamatay nga kusog, hinungdan nga daghang lokal nga opisyal ang nagduhaduha sa bersyon sa federal authorities.
Miresulta kini sa lapad nga protesta sa Minneapolis ug uban pang bahin sa Estados Unidos, ug nanawagan na usab ang mga human rights ug migrant advocacy groups og dinalian nga imbestigasyon ug panagpatubag sa ICE bahin sa ilang papel sa pagpatuman sa balaod sa komunidad.
