Positibo si Independent Commission for Infrastructure Executive Director Atty. Brian Hosaka nga makapasaka na og kaso ang komisyon sa dili pa mahuman ang tuig.
Bisan tuod ang komisyon bag-o lang natukod ug bag-o lang nagsugod sa trabaho, si Hosaka nagtuo nga ang ICI anaa sa hustong dalan uban sa nagpadayon nga serye sa mga imbestigasyon ug mga pagdungog.
Matod niya nga dako usab nga hagit karon ang limitadong gidaghanon sa mga kawani samtang ang komisyon gilangkuban lang sa usa ka chairman ug duha ka commissioner nga nagpahigayon og sunodsunod nga mga pagdungog.
Dugang niini nga ang limitado nga gidaghanon nag-atubang sa ‘well-oiled machine’ nga gilangkoban sa mga nalambigit sa flood control scandal sama sa mga kontraktor, opisyal sa gobyerno, ug uban pang dagkong opisyal nga nalambigit.
Apan, gipasalig ni Hosaka nga ang komisyon nakadungog sa mga reklamo ug singgit sa publiko batok sa gipadayag nga kaylap nga korapsyon, ug mahatagan gayud og hustisya ang pagpahimulos sa pundo sa katawhan.
Gipaambit usab niini nga gitinguha nila nga mapadali ang proseso apan kinahanglan pa nga moagi sa legal nga proseso ang tanan aron masiguro nga lig-on ang reklamo nga ipasaka batok sa mga responsable sa kurapsyon.
