Napun-an ang ihap sa mga nangamatay sa nitikyaob nga Tourist boat sa Ha Long Bay, Vietnam niadtong Sabado.
Kini human sa padayon nga search and rescue operations alang sa lima nga nawala human ang bangka nalunod nga gitawag og “Wonder Sea” diin adunay sakay nga 48 ka mga pasahero ug lima ka mga tripulante tungod sa kalit nga pagbunok sa ulan ug dili maayo nga panahon.
Kadaghanan sa mga pasahero nga namatay kay magka-pamilya gikan sa Hanoi, lakip ang kapin sa 20 ka mga bata.
Matud sa mga awtoridad nga 11 ka mga tawo ang naluwas, samtang 34 nga mga lawas ang na-recover niadtong Sabado sa gabii ug tulo ka mga tripulante usab ang napalgang patay.
Nipadayag og pahasubo si Vietnamese Prime Minister Pham Minh Chinh sa mga namatyan ug nagmando sa mga hingtungdan nga ahensya nga maghimo og hingpit nga imbestigasyon ug sigurohon nga manubag kung kinsa man ang mapamatud-an nga sad-an sa nahitabong insidente.
