SOUTH KOREA-Plano sa unang opposition party sa South Korea nga Democratic Party sa pagduso sa impeachment proceedings batok kang SoKor President Yoon Suk-Yeol kung dili dayon kini mo-resign nunot sa hamubo nga deklarasyon sa martial law nga gibakwi ra dayon.
Sa usa ka pamahayag, ang partido sa oposisyon miingon nga kung dili mokanaog sa posisyon si Yoon, ang Partido mopahigayon og impeachment proceedings subay sa gusto sa katawhan sa South Korea.
Sumala sa koalisyon sa mga magbabalaod gikan sa mga partido sa oposisyon, nagplano sila nga mosugyot og usa ka balaodnon aron i-impeach si Yoon sulod sa 72 ka oras o 3 ka adlaw.
Human sa deklarasyon ni Yoon sa Martial law nga gitumong sa pagdepensa sa ilang nasud gikan sa North Korea ug sa pro-North nga anti-state forces ug pagpanalipod sa ilang independente nga constitutional order, kay nipabutho kini sa kagubot ug mga demonstrasyon diin pipila ka mga tawo ang nisaka pa sa parliament building pinaagi sa pagguba sa bintana ug mga military helicopter nga gipangpalupad.
Samtang, daghang mga protesta ang gipaabot nga mahitabo uban ang pinakadako nga union coalition sa SoKor, nga mao ang Korean Confederation of Trade Unions, nga nagplano sa usa ka rally sa Seoul ug nanumpa nga magprotesta hangtod sa pagluwat ni Yoon.
