Gianunsyo sa Department of Social Welfare and Development (DSWD) nga target sa ahensya nga mapatuman ang unified ID system o unified Identification card for Persons with Disability (PWD) sa katapusan sa tuig.
Kini nga lakang sa DSWD kay nagtumong sa pagsumpo sa nagpadayong isyu sa mga peke nga PWD ID nga gigamit aron makakuha og dili awtorisado nga diskwento sa mga restawran ug uban pang negosyo.
Ning bag-o lang diin gisaway ang Restaurant Owners of the Philippines tungod sa kaylap nga pag-abuso sa mga peke nga PWD ID, nga nagbutang sa grabe nga pressure sa mga establisemento.
Bag-ohay lang nagpahigayon og raid ang mga otoridad sa gamay nga operasyon sa Manila diin giingong gihimo ang mga peke nga PWD ID nga gi-isyu sa mga lokal nga kagamhanan gikan sa Quezon City, Manila, Pasig, Muntinlupa, ug Angat sa Bulacan.
Kahinumduman nga niadtong Disyembre 2024, nipagawas og pasidaan ang Bureau of Internal Revenue (BIR) batok sa pagbaligya ug paggamit sa peke nga PWD IDs, ug sumala pa ni Senador Sherwin Gatchalian, P88.2 bilyones ang naalkansi sa buhis sa gobyerno niadtong 2023 tungod sa giingong pag-peke sa PWD IDs.
Ubos sa bag-ong sistema, aduna kini sumbanan nga disenyo aron malikayan ang pagpanglimbong.
Gipaambit ni DSWD Assistant Secretary Irene Dumlao nga ang unified PWD ID system mopailawom sa pilot implementation stage nga nagsugod niadtong Enero hangtod Hunyo sa tuig 2025, ug ang DSWD sa pagkakaron nag-finalize sa terms of reference sa maong unified system.
Aron masiguro ang seguridad sa datos sa mga PWD, ang DSWD nakigtambayayong sa National Privacy Commission, ingon man sa ahensya sa Department of Information and Communications Technology (DICT) ug Philippine Statistics Authority (PSA) aron maseguro nga hapsay ang pagpatuman sa bag-ong sistema.
Ang bag-ong PWD IDs adunay security features, sama sa Radio Frequency Identification (RFID) technology. Dugang pa, adunay usa ka web portal nga magtugot sa mga establisemento sa pagsusi sa pagkalehitimo sa PWD ID sa usa ka tawo.
Ubos sa Republic Act 10754, ang mga PWD adunay katungod nga maka-avail sa 20% nga diskwento ug VAT exemption sa mga partikular nga produkto ug serbisyo.
