Nagplano ang Indonesian Coast Guard (BAKAMLA) ug Philippine Coast Guard (PCG) kung unsaon pagpalapad pa ang ilang kooperasyon aron mapalambo ang mas dakong kooperasyon sa kadagatan.
Kini nunot sa gipahigayong tigum tali sa duha ka Coast Guards diin ang posibilidad sa joint training, pipila ka maritime challenges, ug uban pang aspeto sa bilateral nga relasyon sa duha ang gituki.
Niadtong Sabado, ang Indonesian CG mibisita sa Pilipinas pinangulohan sa director sa sea operation, First Adm. Basri Mustari kinsa mainitong giabi-abi ni PCG commandant Adm. Ronnie Gil Gavan.
Matod sa tigpamaba sa PCG nga si Rear Adm. Armando Balilo, ang panagtagbo sa duha nagtutok sa pagsulbad sa mga problema sa kadagatan, ug pagpalig-on sa ilang kapabilidad, pagpatuman sa balaod sa kadagatan, ug pagpanalipod sa kinaiyahan sa kadagatan.
Giinsistr ni PCG Commandant Gavan ang panginahanglan nga adunay standard protocol ug procedure alang sa mga miyembro sa ASEAN Coast Guard Forum (ACF), partikular na ang Southeast Asia Protocols for Engagement at Sea tali sa Coast Guard ug uban pang Maritime Law Enforcement Agencies (SEA-PEACE).
Ang maong protocol magbutang og komon nga guidelines alang sa ASEAN Coast Guards atol sa mga engkwentro sa kadagatan.
Gibisita usab sa Indonesian CG ang pipila ka importanteng pasilidad sa PCG sama sa Fleet Education Training Development Institute sa Balagtas, Bulacan ug ang capital ship sa PCG, BRP Melchora Aquino (MRRV 9702).
