Giakusahan sa Israel ang Hamas nga nakalapas sa kasabutan sa ceasefire human nadiskobrehan nga usa sa upat nga nahabilin nga mga hostage nga gitugyan sa grupo gikan sa Gaza niadtong Pebrero 20, kay lahi.
Basi sa resulta sa forensic tests sa mga patayng lawas sa 4 ka hostages nga gipagawas sa Hamas, 3 lang ang kompirmadong giila samtang ang usa giingong dili ang bihag sa Israel nga si Shiri Bibas.
Sumala sa Israeli Defense Forces (IDF), ang 3 ka mga lawas nga gitunol sa Hamas giila nga mga batan-ong anak nga lalaki ni Shiri Bibas, Ariel ug Kfir, samtang ang usa giila nga si Oded Lifshitz, usa ka Israeli nga tigbalita.
Ang militar sa Israel miingon nga sa panahon sa proseso, gitino nga ang lawas, nga gituohan nga si Shiri Bibas, dili motugma sa bisan kinsa sa mga bihag, mao nga wala kini mailhi.
Gipahibalo usab sa IDF nga brutal nga gipatay sa mga terorista ang 2 ka bata sa dihang gidagit sila niadtong Nobyembre 2023 basi sa intelligence ug forensic findings, sukwahi sa kanhing akusasyon sa Hamas nga gipatay sila uban sa ilang inahan sa pagpamomba sa Israel sa Gaza.
Samtang, sa usa ka pahayag, ang Punong Ministro sa Israel nga si Benjamin Netanyahu mihulga nga pabayron ang Hamas sa dili makatarungan ug grabeng paglapas sa kasabutan.
Sa pagkakaron, wala pa mokomentaryo ang Hamas sa akusasyon sa Israel.
