Naglatid na sa inisyal nga mga istratehiya ang Kagamhanang Dakbayan sa Sugbo batok sa Mendicancy karong pag-abot sa “Ber” months ug umaabot Sinulog 2026.
Nahitabo kini nga panagpulong niadtong Miyerkules, Septiyembre 24 sa pag-convene sa Anti-Mendicancy Board nga gipangulohan ni Cebu City Mayor Nestor Archival Sr. aron madumala ang nagkasakang ihap sa mga mendicants sa syudad ilabi na sa mga kadalanan.
Ang maong diskurso sa board kay nagmahinungdanon alang sa pagpalig-on sa kahibalo sa publiko sa Cebu City Anti-Mendicancy Ordinance kinsa nagdili sa paghatag og limos sa mga pampublikong dapit nga nakahatag og risgo sa kinabuhi sa mga manglilimos.
Gitino sa Cebu City Anti-Mendicancy Office nga hingusgan niini ang ilang information drive samtang nagdani sa publiko sa paghatag sa ilang busilak nga hianbang pinaagi sa buhatan sa Cebu City Department of Social Welfare and Services (DSWS).
Gihimug-atan ni Mayor Archival ang samtang nagpatuman sa maong ordinansa sa dakbayan, ang kagamhanang sab kay patas nga maghatag og interbensyon nga nagdalit sa tukmang hinabang sa mga mendicants nga naglakip sa oportunidad sa panginabuhi ug ubang pang support programs.
Gitinguha sa kagamhanang dakbayan nga ang mga paningkamot niini kay nagtumong sa pagbalanse sa pagpatuman sa balaod ug pagmugna sa malungtarong solusyon nga nagpasiugda og kaayohan sa mga kabos nga lumulupyo sa dakbayan.
