Gitay-og usab og magnitude 6.9 nga linog ang amihanang Japan, apan walay gi-isyu nga tsunami warning ug walay gitaho nga mga casualties o dakong kadaot.
Ang linog nahitabo mga alas 7:30 sa buntag sa baybayon sa Iwate Prefecture sa pangunang isla sa Honshu, sa giladmon nga 50 kilometros, sumala sa Japan Meteorological Agency.
Ang pagtay-og nabati hangtod sa Tokyo, kapin sa 700 kilometros gikan sa epicenter. Sa Aomori Prefecture, nga pinakaduol sa epicenter, ang linog natala sa lebel nga “upper 6.”
Gipahunong dayon sa East Japan Railways ang operasyon sa Tohoku Shinkansen bullet train tali sa Sendai ug Shin-Aomori alang sa usa ka inspeksyon sa kaluwasan.
Ingon man nga temporaryong gisirad-an ang pipila ka mga expressway sa Aomori temporaryo alang sa inspeksyon. Apan, ang dagan sa trapiko sa Hachinohe City nagpabilin nga normal ug ang mga traffic light nag-andar pa.
Gitaho usab ni Chief Cabinet Secretary Minoru Kihara nga walay mga report sa mga namatay apan padayon nila nga gimonitor ang sitwasyon.
Ang Nuclear Regulation Authority miingon usab nga walay nakitang mga abnormalidad sa mga nuclear power plant sa Onagawa, Higashidori, ug Tomari sa Hokkaido.
Gimandoan ni Prime Minister Sanae Takaichi ang mga ahensya sa gobyerno nga makigtambayayong sa mga lokal nga gobyerno ug nanawagan sa mga residente nga magpabiling alerto sa posibilidad sa mga aftershock.
Ang Japan usa sa mga nasud nga adunay labing seismically active sa kalibutan, nga nahimutang sa upat ka dagkong tectonic plates sa Pacific “Ring of Fire.”
Gibanabana nga mga 18 porsyento sa dagkong linog sa kalibutan ang nahitabo sa Japan.
