Gipasabot ni Joy Barcoma ang isyu sa bullying nga bag-o lang nalambigit sa iyang ngalan, nga iyang giingon nga naggikan sa usa ka insidente sa dihang estudyante oa kini sa Polytechnic University of the Philippines.
Sa usa ka interbyu, gipaambit ni Miss Philippines Earth 2025 nga nakig-away siya sa usa ka classmate sa kolehiyo. Bisan tuod ang insidente nahitabo dugay na nga panahon, ang isyu nabuhi pag-usab human ang usa ka blind item nag-viral niadtong Marso nga giingong nagtumong kaniya.
Sumala ni Barcoma, ang paghulagway sa isyu sa social media mas nakaapekto kaniya kaysa sa akusasyon mismo. Dugang ni Barcoma nga daw adunay mga tawo nga wala magseryoso sa isyu sa bullying tungod sa paagi sa pagpresentar niini online.
Giangkon usab niya nga ang iyang “dogshow” o kataw-anan ug agresibo nga personalidad sa social media mahimong nakatampo sa sayop nga interpretasyon sa publiko.
Bisan pa, iyang gipasalig nga wala niya gipakamenos ang bullying ug gusto nga mahimong tingog alang sa mga nakasinati og kapintasan, pag-abuso, ug pagbiaybiay.
Sa samang higayon, gipasiugda ni Joy nga ang paggamit sa pulong nga “bullying” dili angay abusuhon, labi na kung kini gigamit lamang kung ang usa ka tawo mobalos o motubag sa mga pagsaway.
Si Joy nagrepresentar sa Pilipinas sa Miss Earth 2025 diin natapos siya sa Top 8. Nailhan usab siya sa social media tungod sa iyang kataw-anan ug relatable nga mga post.
