Niabot sa P9.81 bilyones ang hiniusang kantidad sa kadaot nga gibilin sa Severe Tropical Storm (STS) ‘Kristine’ ug Super Typhoon (ST) ‘Leon’ sa sektor sa pagpanguma.
Base sa updated report sa DA – Disaster Risk Reduction and Management Operations Center, ang duha ka bagyo nakaapekto sa rehiyon sa Cordillera Administrative Region (CAR), Ilocos Region, Cagayan Valley, Central Luzon, CALABARZON, MIMAROPA, Bicol Region, Western, Central , ug Eastern Visayas, Zamboanga Peninsula, SOCCSKSARGEN ug Caraga Region.
Mikabat sa 233,923 ka mga mag-uuma ug mangingisda ang giila nga apektado.
Sa pagkawala sa produksiyon, anaa sa 380,704 metriko tonelada sa mga produkto sa agrikultura ang nadaot gikan sa 183,877 ektarya nga umahan.
Ang mga humayan gitumbok nga labing apektado sa duha ka sunodsunod nga bagyo diin gibanabana nga moabot sa P5.89 bilyones ang danyos.
Anaa kini sa 1.60% nga pagkawala sa tinuig nga target sa produksiyon sa nasud.
Sa pagkakaron, nagpadayon pa ang assessment, aron ma-update ang maong mga datos samtang naglisod usab ang pag-validate sa kadaot nga gipahinabo sa bagyong ‘Leon’ tungod sa kusog nga hangin karon sa Northen Luzon.
