MANDAUE CITY-Nagtukod ang kagamhanang dakbayan sa Mandaue og Business One-Stop Shop (BOSS) aron sa mga paspas nga pag-renew sa mga business permits sa mga negosyante sa syudad ngadto sa Mandaue City Sports Complex nga nagsugod niadtong Enero 2 ug mulangtod hangtod Enero 20, 2025.
Matod pa ni Atty. Charmaine Regine Otadoy, Officer sa Mandaue City Business Processing and Licensing Office (BPLO), nga gi-agni nii ang mga tigpatigayon sa dakbayan ug uban pang clientele sa pag-renew sa ilang permits sa mas daling panahon aron sa paglikay sa mga penalties niini.
Dugang pa sa opisyal nga wala silay gilatid nga extensions sa maong proseso.
Gikatahong sa unang adlaw niini niadtong Enero 2 kay adunay 200 ka mga negosyante ag mi-renew sa ilang mga permits.
Dugang pa niya nga ang mga negosyante makapili sa online processing gikan sa kaharuhay sa ilang mga panimalay o mopili sa walk-in service sa Sports Complex aron makadawat og tabang kon gikinahanglan.
Ang opisyal nag-ingon nga ang proseso gipasimple sukad kini natukod kaniadtong 2020 sa panahon sa pandemya.
Ang pag-renew sa business permit mahimong magamit gikan sa alas 8:00 sa buntag hangtod sa alas 5:00 sa hapon gikan sa Lunes hangtod sa Biyernes ug alas 8:00 sa buntag hangtod sa alas 3:00 sa hapon. sa katapusan sa semana.
Tungod kay kini usa ka One-Stop Shop, gawas sa BPLO, ang City Treasurer’s Office ug Real Property Tax Office makita usab sa complex.
Dugang pa, ang mga regulatory offices sama sa Sanitary Office, City Environment and Natural Resources Office, City Veterinary, ug uban pa, anaa usab.
Matod ni Otadoy nga ang madawat sa mga negosyante sa renewal mao ang assessment, apan ang permit gikatakdang ipagawas sa unang semana sa Pebrero.
