Gisuportahan ni House Speaker Faustino “Bojie” Dy III ang panawagan ni Presidente Ferdinand Marcos Jr. alang sa usa ka special session sa Kongreso sa Hunyo 17, 2026 aron ma-finalize ang mga balaodnon nga naka-focus sa pamilyang Pilipino.
Sumala ni Speaker Dy, andam ang House sa pagtubag sa Proclamation No. 1318 sa Presidente.
Giklaro niya nga ang tanan nga mga prayoridad nga balaod nga gihisgutan sa proklamasyon naaprobahan na sa House sa wala pa kini mag-adjourn niadtong Hunyo 3.
Lakip sa mga balaodnon nga giduso mao ang Anti-Political Dynasty Law, National Center for Geriatric Health Act, mga pag-usab sa GASTPE ug Pantawid Pamilyang Pilipino Program (4Ps), ingon man ang Assistance to Individuals in Crisis Situation (AICS) Act. Diin kini nagtumong sa pagpalig-on sa social protection, edukasyon, ug panglawas sa nasud.
Si House Majority Leader Ferdinand Alexander “Sandro” Marcos miingon nga kini nga lakang sa administrasyon nagpakita sa pagkadinalian sa pagpasar sa mga balaodnon nga makahatag og dakong benepisyo sa mga mahuyang nga sektor.
Gipasalig usab sa liderato sa Kamara nga makigtambayayong sila sa Senado ug sa Executive Branch aron hingpit nga mapatuman ang maong mga lakang sa reporma alang sa kaayohan sa katawhan.
