CEBU CITY — Aduna nay persons of interest sa pagpatay sa grade 10 student kinsang gi-martilyo ang ulo niini sa Sitio Banilad, Brgy. Tomonoy, lungsod sa Moalboal, Cebu.
Matud sa imbestigador sa Moalboal Police Station nga si Police Corporal Dennis Sun nga robbery with murder ang usa sa mga gitan-aw nga anggulo sa kamatayon ni Harriz Bell Olivo human nga napalgan ang patayng lawas niini niadtong Hulyo 4 sa buntag.
Kini human nga mipatim-aw ang lima ka mga witnesses diin naabtan nila ang tulo ka mga lalaki kuyog ni Olivo pipila ka oras sa wala pa kini gipatay.
Dugang pa ni Sun nga ig-agaw sa biktima ang usa sa mga persons of interest sa pagpatay.
Gibutyag ni Sun nga robbery ang usa sa mga motibo tungod kay nawala ang cellphone nga gigamit ni Olivo sa wala pa nahitabo ang maong krimen.
Base sa pagpakisusi sa Moalboal Police Station nga aduna nay record sa pagpangawat ang persons of interest apan nasulbad lang kini sa barangay level ug wala lang kini ma-report pa sa kapulisan.
Kahinumduman nga narekober gikan sa crime scene ang martilyo nga giingong gigamit sa suspek duol sa patayng lawas sa biktima.
